မိုးကြိုးနဲ့ မိုဘိုင်းဖုန်း (ယူနီကုဒ်)

မိုးကြိုးနဲ့ မိုဘိုင်းဖုန်း
မိုးရွာနေတုံး မိုဘိုင်းဖုန်းသုံး ရင် မိုးကြိုးပစ်ခံရဖို့ အန္တရာယ် ပိုမများပါ။
၂၀၀၆ က ဘီဘီစီနဲ့ BMJ ဆေးဂျာနယ် က ဆောင်းပါး တခုကြောင့် မိုးရွာထဲမှာ မိုဘိုင်းဖုန်းကို ကိုယ်နဲ့ အတူဆောင်ထားသူတွေ၊ မိုးရွာထဲမှာ မိုဘိုင်းဖုန်း သုံးသူတွေ မိုးကြိုးပစ်ခံရဖို့ ပိုများတယ်ဆိုပြီး အင်တာနက်မှာပြန့်ခဲ့ပါတယ်။
အဲဒါမမှန်ပါဘူးဆိုတာကို အမေရိကန် မိုးလေဝသဌာန မိုးကြိုးအန္တရာယ် ကာကွယ်ရေး ၊ အမေရိကန် စတန်းဖိုဒ် တက္ကသိုလ် ၊ သြစတေးသျှ မိုဘိုင်းဖုန်း ဆက်သွယ်ရေးအသင်းကြီး စတဲ့ မိုးကြိုးအန္တရာယ်ကို စနစ်တကျ လေ့လာကြတဲ့ဌာနကြီးတွေက အတိအလင်းပြောကြားပြီး ဖြစ်ပါတယ်။
မိုးရွာနေချိန်၊ မိုးကြိုးမုန်တိုင်းကျ နေချိန်တွေမှာ စိတ်ချရတဲ့ အဆောက်အဦ တွေထဲမှာ မနေဘဲ အပြင်မှာရှိနေရင်တော့ လူတိုင်း မိုးကြိုးပစ်ခံရမဲ့ အန္တရာယ် ရှိကြပါတယ်။
အဲဒီ အန္တရာယ်က အိတ်ထဲမှာ မိုဘိုင်းဖုန်းဆောင်ထားတာ သုံးစွဲတာတွေ နဲ့ ဆက်စပ်မှု မရှိပါဘူးတဲ့။
မိုဘိုင်းဖုန်း မှာ လျှပ်ကူးပစ္စည်းထက် လျှပ်ကာပစ္စည်းက ပိုများပြီး၊ ဖုန်းကသုံးတဲ့ ရေဒီယိုလှိုင်းက မိုးကြိုးကို ဆွဲဆောင်တာမျိုး မရှိဘူးလို့ ဆိုပါတယ်။
တချိန်ထဲမှာဘဲ  မိုးရွာနေချိန် ကြိုးဖုန်းနဲ့ ပြောနေရင်း ဖုန်းကြိုးကို မိုးကြိုးလျှပ်စစ်ဓါတ်ဝင်လို့  ဓါတ်လိုက် သေဆုံးတာကတော့ မိုးကြိုးကြောင့် သေဆုံးသူရဲ့ ၄-၅ ရာနှုန်း ရှိတယ်လို့ ဆိုပါတယ်။
အဲဒါကြောင့် မိုးကြိုးမုန်တိုင်းကျနေချိန် အရေးပေါ်ဆက်သွယ်စရာရှိရင် မိုဘိုင်းဖုန်း ကိုသာသုံးပါ ကြိုးဖုန်းကို မသုံးပါနဲ့လို့ အကြံပြုထားပါတယ်။
မိုးကြိုးမုန်တိုင်းထဲမှာ အနားက ဒုက္ခရောက်နေသူကိုကူဖို့ ခေါ်စရာ မိုဘိုင်းဖုန်း လက်ထဲမှာ အဆင်သင့် မရှိတာက မိုးရွာထဲမှာ မိုဘိုင်းဖုန်း သုံးတာထက် ပို အန္တရာယ်ရှိတယ်လို့ မှတ်သားရကြောင်းပါ ခင်ဗျာ။
တခုတော့ရှိတာပေါလေ၊ မိုးရွာနေချိန် မိုဘိုင်းဖုန်းကို အားသွင်းကြိုး တန်းလန်းနဲ့ သုံးရင်တော့ ကြိုးဖုန်းကို သုံးသလိုဘဲ အန္တရာယ် ရှိပါတယ်။
မှားတာတွေ့ရင်လဲထောက်ပြပေးပါ၊ ရှဲလိုသူများလဲ လွတ်လပ်စွာရှဲနိုင်ပါတယ်။
ဖိုးသုညပါ။

ကျွန်တော်ဒီပို့စ်ကို အမေရိကန် မိုးလေဝသဌာန ရဲ့ http://www.srh.noaa.gov/srh/jetstream/lightning/lightning_faq.html
http://www.lightningsafety.noaa.gov/struck.shtml 
အမေရိကန် စတန်းဖိုဒ် တက္ကသိုလ်ရဲ့ http://large.stanford.edu/courses/2012/ph250/agarwal1/
သြစတေးသျှ မိုလိုင်းဖုန်းဆက်သွယ်ရေးအသင်းကြီးရဲ့  http://www.amta.org.au/pages/Mobile.phones.and.lightning

 တို့ကို ကိုးကားရေးသားပါသည်။